Safiirka Soomaaliya u fadhiya dalka Itoobiya ayaa waxa uu sheegay Maxaabiista laga sii daayay xabsiyada Itoobiya ay hada ku sugan yihiin magaalada Jigjiga, lana qorsheynayo in dalka la keeno.

Waxa uu sheegay isaga iyo safiir ku xigeenka Somaaliya u fadhiya Itoobiya in ay tagi doonaan magaalada Jigjiga, si ay ula socdaan xaalada Dhalinyarada Soomaaliyeed ee laga sii daayay Itoobiya.

Sidoo kale Safiirka wuxuu sheegay Maxaabiista qaarkood in loo heysto dambiyo la xiriira in ay si sharci daro ah ku galeen Itoobiya, kuwo sharciga uu ka dhacay iyo kuwo loo heysto falal ami daro.

Sii deynta Maxaabiistan ayaa waxaa ka shaqeeyay Madaxweynaha Soomaaliya Maxamed C/laahi Maxamed (Farmaajo) iyo Ra’iisul Wasaaraha dalka Xasan Cali Khayre.

Maxabiista ay hada sii deysay Dowladda Itoobiya ayaa waxa ay gaaayaan ilaa 120, kadib heshiis dhexmaray Madaxda ugu sareysa dalalka Itoobiya iyo Soomaaliya.

Dowladda Soomaaliya ayaa maalmaha soo socda waxa ay qorsheyneysaa in ay Diyaarado gaar ah u dirto Dhalinyarada Soomaaliyeed ee ay sii deysay Itoobiya, si loogu soo celiyo Soomaaliya.

HOME