---

Qeybtii 13-aad

DAACADI MA HUNGOWDO.

Beri baa laba nin oo gedisley ah oo subagga ka ganacsada ayaa wax isku yeeshay. Mid ka mid ah ayaa maalintii dambe saaxiibkiisii kale ku yiri hebelow xoogaagi lacagta ahaa ee xagaaga iga soo jiray I sii, hase yeeshee ninkii wuu ismoogaysiiyey, ugu dambeyntiina wuuba inkiray inuu wax lacag ah uu ku lahaa oo ay xagiisa soo jirtay. Labadii nin khilaaf baa soo kala dhex galay, wayna isku buuqeen, hase yeeshee waxay isula tageen qo garsoore ah oo kala gura, ninkii markuu labadii nin xaaladooda waraystay mid walba sheekadiisii run buu u ekaysiiyey, wuxuuna garan waayey garsoorihii si uu arrintaa u xukumo, hase yeeshee nin caqli badnaa oo magaalada dhinac kaga noolaa ayaa arrintii kala tashaday nimankiina waqti kale ayuu balansaday, ninkii caqliga badnaa wuxuu yiri "aniga ayaa arrinta xalinaya laakiin muddo todobaad ah I sii.

Labadii nin ayuu mid kasta wuxuu u geeyey teneg subag ah oo min 30 kiilo ah, oo mid kasta lagu dhex riday 30 shilin oo caddaan ah, nin walbana wuxuu ku yiri "Saaxiib subagan ii iibi, lacata aad ku gadana ii keen anaa ku siinaya khidmadaadee" ninkii ninka lacagta ku sheeganayey tanagii loo dhiibay markuu soddonkii kiilo min shil ku gaday ayuu misana wuxuu tanagii ka dhex helay 30 shilin oo caddaan ah, 60-kii shilin ayuu ninkii u wada keenay, wuxuuna ku yiri; "soddonkan shilin Subigii ayaan ku gaday, soddonkan kalena tanagay kaaga dhex luntay" intuu ka qaatay oo adeegiisiina siiyey ayuu wuxuu hoosta ka ogaaday in ninkani yahay daacad.

Ninkii kale ayaa u yimid wuxuuna u keenay 25 shilin oo wuxuu ku yiri "subagii wuxuu noqday 25-kaa shilin, shaqadaydiina adiga ayaa lagaa rabaa."

Ninkii caaqilka ahaa islamarkiiba wuxuu u tagay ninkii qaadiga ahaa wuxuuna u sheegay in labada nin midka ay wax ka maqan yihiin uu run sheegayo kan kalena uu been sheegayo, sidii ayaana lagu xukumay.

CUMAR BEENAALE

Beri baa wiil ari jir ah wuxuu caado ka dhigtay maalintii markuu ariga jiro inuu ku qayliyo intuu geed fuulo, war Isoo gaaray….. arigii yey baa dhamaysayey…. Dadku markay arrintaa maqlaan intay warmahooda iyo ulahooda suu qaataan ayey u soo gurmadaan, hase yeeshee markay meeshii yimaadaan arrintaa way ku hungoobaan oo been bay noqotaa, iyagoo ka xun lugooyada iyo beenta loo sheegay ayey dib guryahooda ugu soo noqdaan, hase yeeshee dhowr mar ayuu cumar beenaale dadkii sidaa ku soo lugooyey isagana caado ayuuba ka dhigtay inuu maalin walba sidaa sameeyo, marka ay dadku ku yiraahdaan war aaway yeyda iyo bahalada aad sheegaysana wuxuu yiraahdaa waa beentay oo waan idinku ciyaarayey, hase yeeshee maalintii dambe isagoo cumar beenaale arigii la jira ayaa yeydii soo weerartay, qeylo ayuu afka furtay hase yeeshee dadkii wax dheg jalaq u siiyey ma jirin,or iyo dhaar ayuu isku daray haseyeeshee afka inta loomaroojiyey ayaa lagu yiri ceebtiisa ma ahee waa cadfadiisa, markaasaa qofkastana iska ag maray, cumar markuu ogaaday in dadkii aanay waxbo ka rumeysaneynin arigiina uu ogaa sida ay yeeydii u rafaadineysay ayey la noqon wayday, markaasuu intuu aad u qayliyey misana dhulka isku galgaliyey, markaasay dadkii ku yiraahdeen waryaa maxaad caradda ugu rafaneysaa , ma beentaadii ayaad weji cusub u yeeshay, markaasuu cumar oo rabay in mar kelya lala hadlo yiri war weligay anigoo been sheegayo waad arki jirteena anigoo dhulka isku galgalinayo ma aragteen, dadkii markaas ayey gareysteen oo intay warma hoodii qaateen arigii yeydii ka celiyeen, maalintaas ka dibna cumar been dambe ma sheegin.

Qeytbtii 12-aad halkaan ka Aqriso

Lasoco Qeybta Xigta todobaadka Danbe ama Arbacada Danbe

Fiirio Gaar ah:

Waxaa Qorey Cabdulqaadir Nuur Xuseen (Maax)
Wixii talo ama fikrad ah oo la xiriira Buugyarahan
waxaad igala soo xiriiri kartaan Cinwaankayga ah:
E-Mail: cabdiqadirnur@hotmail.com
Tel:00 2522-4150 622